Sa ikalawang araw ng University Week, muling nagtipon ang iba’t ibang departamento upang ipamalas ang kani-kanilang husay at talino. Sa umaga, isinagawa ang patimpalak sa Filipino category na ginanap sa CON Building, Room 301. Isa itong makulay na yugto ng selebrasyon na nagbigay-diin sa kahalagahan ng wika bilang daluyan ng damdamin, ideya, at pagkakaisa ng pamantasan.

May 16 na kalahok ang lumahok sa Talumpati, bawat isa ay nagdala ng sariling tinig at pananaw mula sa kani-kanilang kolehiyo. Ang entablado ay nagsilbing bukas na espasyo kung saan ang mga estudyante ay nakapagpahayag ng kanilang saloobin.

‎Si Lycerme John D. Ybañez, isang mag-aaral mula sa College of Education, ay nagbahagi ng kanyang saloobin tungkol sa kaganapan.

‎“Personal, mas pinapanigan ko ang College of Education dahil sa kanyang tamang diksyon at malinaw na tinig. Nagustuhan ko ang piraso, at bukod sa College of Education, nagustuhan ko rin ang kalahok mula sa College of Communication,” ani Ybañez.

Dalawa sa mga kalahok ang namukod-tangi sa kanilang pagganap: Si Aaron Justin Sentin mula sa College of Education at si Loudette Belencion mula sa College of Communication. Ang kanilang talumpati ay hindi lamang nagpakita ng husay sa retorika kundi nagbigay rin ng matinding damdamin at paninindigan. Ang kanilang tinig ay kumakatawan sa lakas ng kabataan na handang tumindig para sa bayan at pamantasan.

‎Sa temang “BANAAG sang WEST: Celebrating our Radiant Gleam in Illuminating Generations,” naging gabay ang diwa ng pagdiriwang upang ipakita ang liwanag ng bawat estudyante. Ang tema ay nagsilbing paalala na ang pamantasan ay hindi lamang tahanan ng kaalaman, kundi bukal din ng inspirasyon at pag-asa. Sa pamamagitan ng Talumpati, naipakita ang kahalagahan ng pagkakaisa sa kabila ng pagkakaiba-iba ng pinagmulan.

Ang University Week ay hindi lamang selebrasyon ng talento kundi isang pagkakataon upang muling pag-isahin ang iba’t ibang tinig mula sa iba’t ibang departamento. Sa bawat pagtatanghal, lumilitaw ang mensahe na ang tunay na lakas ng pamantasan ay nasa pagkakaisa ng komunidad. Ang mga kalahok ay hindi lamang nagtagisan ng husay, kundi nagbigay rin ng inspirasyon sa kanilang mga kapwa mag-aaral.

Ang ikalawang araw ng University Week ay nagsilbing patunay na ang pamantasan ay tahanan ng mga tinig na handang magbigay-liwanag sa lipunan. Sa pamamagitan ng Talumpati, naipamalas ang tapang, talino, at malasakit ng kabataan. Ang kanilang mga tinig, bagama’t nagmula sa iba’t ibang kolehiyo, ay nagtagpo upang ipakita ang isang nagkakaisang pamantasan—isang pamantasan na patuloy na nagliliwanag para sa susunod na henerasyon.

Ni Frenchie Banias at Rayver John Ilano, SBR Class
Mga larawan kuha ni Jianna Maurice Santos, SBR Class